1 лістапада, Віцебск /Кар. БЕЛТА/. У Віцебскім абласным краязнаўчым музеі адкрываецца выстава "Сям'я па духу: разам у царстве зямным і ў Царстве нябесным". Аб гэтым карэспандэнту БЕЛТА паведамілі ў Віцебскай епархіі.

Выстава прысвечана 105-годдзю з дня трагічнай гібелі сям'і апошняга расійскага імператара Мікалая ІІ і яго бліжэйшага акружэння. Размова таксама аб тых, хто застаўся з імі да канца, і ў ноч на 17 ліпеня 1918 года прыняў пакутніцкую смерць: царскую сям'ю і прыбліжаных расстралялі па загадзе бальшавікоў.

"Гэта і святы ўрач Яўген Боткін, які нядаўна, у 2016 годзе, праслаўлены Рускай праваслаўнай царквой, пакаёвая дзяўчына Ганна Дзямідава, камердынер Алаіз Труп з Віцебскай губерні і повар Іван Харытонаў. Розныя структуры Віцебскай епархіі, абласны краязнаўчы музей і абласная бібліятэка сумесна арганізавалі выставу, каб ушанаваць памяць навамучанікаў", - растлумачылі ў епархіі.

У экспазіцыю ўвайшлі каля 50 сучасных кніг, некаторыя папросту не змагла ўмясціць зала. Літаратура прадастаўлена з фондаў абласной бібліятэкі імя У.І. Леніна, асабістай бібліятэкі архіепіскапа Віцебскага і Аршанскага Дзімітрыя і праваслаўнай бібліятэкі імя А.П. Сапунова пры Віцебскай духоўнай семінарыі. Таксама ёсць экзэмпляры з епархіяльнай бібліятэкі святой велікамучаніцы Кацярыны і бібліятэкі святой велікамучаніцы Ірыны з прадстаўніцтвам Беларускага экзархата пры Патрыяршым падвор'і ў Маскве. Кнігі знаёмяць з дынастыяй Раманавых, жыццём і ахвярным служэннем сям'і Мікалая ІІ.

Больш як 30 экспанатаў Царкоўна-археалагічнага музея Віцебскай епархіі, якія таксама ўключае выстава, адносяцца пераважна да канца ХІХ - пачатку ХХ стагоддзя. Паводле слоў арганізатараў, тут ёсць рэдкія прадметы, якія звычайна даступны толькі духоўнаму сану.

"Унікальнасць экспазіцыі ў тым, што і для жанчын, якія хочуць даведацца больш аб царкоўным богаслужэнні, уладкаванні праваслаўнага храма ў алтарнай прасторы, прадстаўляецца магчымасць азнаёміцца з экспанатамі, якія выкарыстоўваюцца ў час богаслужэння", - адзначылі ў Віцебскай епархіі.

Праект пераадольвае трэці этап: першыя два прынялі сцены абласной бібліятэкі і Віцебскага дзяржаўнага тэхналагічнага ўніверсітэта. Экспазіцыя паступова пашыраецца, цяпер яна папоўнілася 15 абразамі з фондаў краязнаўчага музея і новымі экспанатамі з Царкоўна-археалагічнага музея. У Віцебскім абласным краязнаўчым музеі выстава "Сям'я па духу: разам у царстве зямным і ў Царстве нябесным" адкрыецца 1 лістапада ў 17.00 і будзе працаваць да 21 лістапада.

Аўтарскае права БелТА