15 снежня, Віцебск /Алеся Пушнякова - БЕЛТА/. У час выязнога пасяджэння экспертна-кансультатыўнага савета (ЭКС) пры Прэзідыуме Савета Рэспублікі Нацыянальнага сходу Беларусі ў Віцебску старшыня Савета Рэспублікі Наталля Качанава наведала выстаўку "Беллегпрама", а таксама ВНУ і ССНУ, якія рыхтуюць кадры для лёгкай прамысловасці, перадае карэспандэнт БЕЛТА.

Экспазіцыя складалася з трох секцый - "Лёгкая прамысловасць вачамі навучэнцаў", калекцыі Віцебскага дзяржаўнага тэхналагічнага ўніверсітэта (ВДТУ) і прадукцыі, якую вырабляюць прадпрыемствы і арганізацыі канцэрна "Беллегпрам". ССНУ з Мінска, Брэста, Віцебскай вобласці прадэманстравалі свае напрацоўкі і калекцыі з сучасных і традыцыйных тканін. Лён, бавоўна, трыкатаж пасля дызайнерскай работы выглядаюць у гатовых вырабах ультрамодна, стыльна, маладзёжна. Наталля Качанава таксама звярнула ўвагу на прэзентацыйны стэнд Рэспубліканскага фестывалю-конкурсу моды і фота "Млын моды", які курыруе Нацыянальны цэнтр мастацкай творчасці дзяцей і моладзі Мінадукацыі. Тут былі прадстаўлены праекты пераможцаў і прызёраў конкурсу. Як адзначылі прадстаўнікі Наццэнтра, гэты фестываль адкрывае маладыя таленты і дае штуршок да развіцця айчыннай моды.

Удзельнікі пасяджэння ЭКС азнаёміліся з работамі маладых дызайнераў, аспірантаў універсітэта. Калекцыя з экаскуры, якая цяпер з'яўляецца папулярным матэрыялам у аматараў модных брэндаў, прыцягвала ўвагу ўдзельнікаў выязнога пасяджэння. "Трэнды трэба задаваць самім", - падкрэсліла Наталля Качанава, ацаніўшы крэатыўны падыход перспектыўных талентаў з ВДТУ.

Таксама на выстаўцы былі прадстаўлены адзенне, абутак, сумкі, галантарэя, якую выпускаюць вядучыя прадпрыемствы "Беллегпрама", уключаючы тавары для дзяцей і спецыяльнага прызначэння, напрыклад, спецадзенне.-0-

Аўтарскае права БелТА